Wo Shakhs Kitna Sudhar Gaya Hai

Wo Shakhs Kitna Sudhar Gaya Hai Full Urdu Poem By Shafique Khokhar-- www.akhrish.com

وہ شخص کتنا سدھر گیا ہے

کہ دل سے میرے اتر گیا ہے

تھا اک تعلق عذاب سا جو

وہ ٹوٹ کر اب سنور گیا ہے

جو ساتھ رہ کر بجھا بجھا تھا

بچھڑ کے کتنا نکھر گیا ہے

سکوں ہے اب جو نہ یہ خبر ہے

اِدھر گیا یا اُدھر گیا ہے

جو کوچہ کوچہ بھٹک رہا تھا

وہ آج اپنے ہی گھر گیا ہے

سرہانے رکھ کے تھا میں تو سویا

یہ ڈر نہ جانے کدھر گیا ہے

وہ وہم جس پہ میں مر مٹا تھا

میں جی اٹھا تو وہ مر گیا ہے

نہ ڈھونڈ اُس کو تو اِس کنارے

جو پار کب کا اتر گیا ہے

میں راہ سے وقت پہ ہٹا ہوں

سو وقت گزرا، گزر گیا ہے

ہے خوش نصیبی کمال ابرک

کہ رائیگاں یہ سفر گیا ہے

ا​تباف ابرک