اے رشک ِ گل انداماں ، اے پیکر ِ رعنائی تتلی تری دیوانی ، بلبل ترا شیدائی

اے رشک ِ گل انداماں ، اے پیکر ِ رعنائی

تتلی تری دیوانی ، بلبل ترا شیدائی

تُو حسن کی دیوی ہے ، یا روپ کی شہزادی

پُنّوں ترے پروانے ، سسیاں تری سودائی!

تو ناز ِ غزالاں ہے ، یا جان ِ بہاراں ہے؟

لیلٰی بھی تری خواہاں ، مجنوں بھی تمنائی !

رانجھے بھی ترے نوکر ، ہیریں بھی تری چاکر

مہینوال بھرے پانی ، سسی کرے ستھرائی

ہم نے تری الفت میں ، اشعار جونہی لکھے

فرہاد نے سنگت کی ، شیریں نے غزل گائی

کیا مہر و مہ و انجم ، کیا برگ و گل و لالہ

سب تیری بلائیں لیں ، اے موجہء زیبائی

تو خلد سے آئی ہے؟ کُوہ قاف میں رہتی ہے؟

حوروں سے تری یاری ، پریوں سے شناسائی

رنگین ترا آنچل ، بانہوں میں جو لہرایا

جھٹ قوس ِ قزخ آئی ، تعظیم بجا لائی

ہر پھول ترے صدقے ، ہرشاخ ترے قرباں

ہر گوشہء گلشن میں ، ہے تیری پذیرائی

آنکھیں تری بادامی ، اور چال ہے مستانی

آہوئے حرم ہے تُو ، یا ناقہء صحرائی

کس حسن کے سانچے میں ، رب نے تجھے ڈھالا ہے

نظّارہ کرے گل بھی ، بھونرا بھی تماشائی

ہم بھی ہیں ترے طالب ، بخش ایک نظر گاہے

اے مست ِ مےء ہستی ، اے محو ِ خود آرائی

آواز تری سن کر ، جان آئے مری جاں میں

ہے تیرے تکلم میں ، تاثیر ِ مسیحائی

تو مکتب ِ خوباں ہے ، جاری ہے ترا فیضاں

پھولوں نے ادا سیکھی ، کلیوں نے حیا پائی

جس نے تجھے دیکھا ہے ، میں دیکھتا ہوں اُس کو

لگتا ہے کہ آنکھوں میں ، تصویر اُتر آئی

شمعیں بھی جلائی ہیں ، کلیاں بھی سنواری ہیں

اے جان ِ غزل آ جا ، دیکھ انجمن آرائی

ہر چند کہ دل چاہے ، باتیں میں کروں تجھ سے

پر تیرے حضور اپنی ، ہوتی نہیں شنوائ

تیرے ہی لئے کی ہے ، ناصر نے یہ گلکاری

کچھ قافیہ پیمائی ، کچھ حاشیہ آرائی