ہم جانتے تو عشق نہ کرتے کسو کے ساتھ لے جاتے دل کو خاک میں اس آرزو کے ساتھ

ہم جانتے تو عشق نہ کرتے کسو کے ساتھ

لے جاتے دل کو خاک میں اس آرزو کے ساتھ

مستی میں شیخ شہر سے صحبت عجب رہی

سر پھوڑتے رہا کیے اکثر سبو کے ساتھ

تھا عکس اس کی قامت دلکش کا باغ میں

آنکھیں چلی گئیں ہیں لگی آب جو کے ساتھ

نازاں ہو اس کے سامنے کیا گل کھلا ہوا

رکھتا ہے لطف ناز بھی روے نکو کے ساتھ

ہم زرد کاہ خشک سے نکلے ہیں خاک سے

بالیدگی نہ خلق ہوئی اس نمو کے ساتھ

گردن بلند کرتے ہی ضربت اٹھا گئے

خنجر رکھے ہے اس کا علاقہ گلو کے ساتھ

ہنگامے جیسے رہتے ہیں اس کوچے میں سدا

ظاہر ہے حشر ہو گی نہ ایسے غلو کے ساتھ

مجروح اپنی چھاتی کو بخیہ کیا بہت

سینہ گتھا ہے میؔر ہمارا رفو کے ساتھ

میر تقی میر